"Бір нәрсеге, не өнерге талпыну үшін адамға адалмен табандылық қажет."

Әл-Фараби.


Адам бойындағы ізгі қасиеттер туралы айтқанда халқына қадірлі, еңбекқор, елінің өнері мен мәдениетін көркейтуде еңбек сіңірген, ұлтжанды азаматтар ойға түседі. Олар қай жағынан да, алуан құбылып, ғажап нұр шашып тұратын асыл алмаз секілді. Елге жасаған еңбегімен, ізгілікті ісімен халық жадында мәңгілікке сақталған танымал, мәдениет,өнер қайраткерлері облысымызда мақтанышпен айтарлықтай деуге болады. "Өнер әлемі-асыл қазына" атты блогта Ақтөбе облысының мәдениетінің көркеюіне өз үлесін қосқан, туған еліміздің тарихына, тылсым құпия сырларына күш-жігерін, білім-тәлімін, өмірін, бойындағы бар өнерін арнаған биік тұлғалар.

ТӨЛЕКОВ БЕК


ТӨЛЕКОВ БЕК
1926 жылы 17 тамызда Ақтөбе облысы Степной, қазіргі Қарғалы ауданында туған. Мүсінші. Қазақстанның еңбек сіңірген өнер қайраткері.(1976).  1949 жылы Алматы көркемсурет училищесінің театр-декорация бөлімін, арада бірнеше жыл өткен соң жаңадан ашылған мүсін бөлімін бітірді. Оның Алматыдағы Министрлер Кеңесі ауруханасының алдына орнатылған «Ана» композициясы (1971) Қазақстандағы алғашқы қолданбалы-саябақтық мүсін өнері болып табылады, сондай себептермен ол республикамыздағы қалалық саябақтық мүсін өнері негізін салушылардың бірі болып есептеледі. Сондай-ақ 28-гвардияшы-панфиловшылар атындағы саябақта орнатылған генерал И.В.Панфиловтың, Ресейдің Невель қаласындағы Мәншүк Мәметованың ескерткіштері мен мәрмәрдан соғылған «Қыз портреті» деп аталатын мүсіндік туындысы да шебер қолтаңбаның көріністері. Мамандар оның қылқаламдық «Симфониялық оркестрдің дирижері Фуат Мансуров (1960), «Екі мәрте Социалистік Еңбек Ері шопан Жазылбек Қуанышбаевтың портреті» (1969) еңбектерін де жоғары бағалады. «Абай», «Абай мүсіні» еңбектері Абайдың мемлекеттік қорық-музейі қорында сақтаулы тұр. Б.Төлеков қазақ ұлттық қолданбалы өнер мектебіне 1960-жылдары қосылған қуатты топтың көрнекті өкілдерінің бірі ретінде мәлім.