Райымбергенов Ысқақ 1929 жылы
Қарабұтақ ауданында Қосағаш
ауылында дүниеге келді. Күйші, сазгер, ұстаз, қол
өнер шебері, өнер зерттеушісі. Ақтөбе педагогика училищесінде 40 жылға жуық дәріс беріп, көптеген шәкірттер
дайындады. Құрманғазы, Қазанғап, Мүсірәлі күйлерін шебер орындап, қалың елге
тартумен бірге өзі де «Жастар биі», «Балдырған», жалпы саны 10 күй, «Егіншілер»
атты ән шығарған. Ж.Айпақов, Ә.Өтеғұлов, Жырау, Жүсіп Сейілов сынды өнер саңлақтарымен бірге туған өлкеде өнерді көтеруге атсалысқан. Қазақтың ұлттық ою-өрнектерін жинап, дамытып,
оған жас ұрпақты баулуға күш салған. Домбыра, қобыз сынды ұлт аспаптарын акустикалық түрде зерттеп, өзі де көптеген
аспаптар жасай білген. Өзі жасаған қобыз Алматы өнер зерттеушісі шеберлерінің
жоғары бағасын алған, қазір облыстық мұражайда сақтаулы тұр. «Қазақ әдебиеті»,
«Қазақстан мұғалімі», «Лениншіл жас», облыстық «Коммунизм жолы» газеттерінде
күй, айтыс өнері, қазақтың қол өнері мен саз аспаптары туралы ой толғап,
көптеген мақалалар жазған. Өсімдіктер мен жан-жануарлардың қазақша атаулары
жайлы қалдырған мұрасы өз кезегін күтіп
жатқан үлкен жұмыс. «Қазақ КСР білім беру ісінің үздігі». 1988 жылы Ақтөбе
қаласында дүниеден өтті.