РУЖЕВА АЛТЫН
(1928-1990)
(1928-1990)
1928 жылы 28
ақпанда Ақтөбе облысы Байғанин ауданы Оймауыт ауылында туған. Театр актрисасы.
Қазақстанның халық артисі (1970), Қазақ КСР-інің еңбек сіңірген артисі (1966).
1946 жылы Алматы киноактерлер мектебін бітірген соң, сахналық өнер жолын Ақтөбе
музыкалық драма театры труппасында бастады. Театрдың жабылуына байланысты 1947
жылы Жамбыл қаласындағы Абай атындағы облыстық драма театрына актриса болып
ауысады, онда 1979 жылға дейін өнер көрсетті. 30 жылда мол тәжірибе жинақтап,
танымалдыққа, абыройға ие болды. 1979-1981 жылдары Атырау театрында директор
болып, 1982 жылдан өмірінің соңына дейін Талдықорған облыстық драма театрында
қызмет істеді. Сахнада 180 образ жасап, Айман, Еңлік, (М.Әуезов,
«Айман-Шолпан», «Еңлік-Кебек»), Ақтоқты, Баян (Ғ.Мүсірепов, «Ақан
сері-Ақтоқты», «Қозы-Көрпеш-Баян сұлу»), Қарашаш (Ш.Құсайынов, «Алдар көсе»),
Ақжүніс (С.Камалов, Е.Брусиловский, «Ер Тарғын»), т.б. басты рольдерді шебер
орындады. Актерлік шеберлігі аударма спектакльдерде жан-жақты көрініп,
шыңдалып, жетіле түсті. Ш.Айтматовтың «Ана-Жер анасындағы» Толғанай,
К.Треневтің «Любовь Яроваясындағы»
Любовь Яровая, Н.Гогольдің «Үйленуіндегі» Агафья Тихоновна, А.Островскийдің
«Жазықсыздан жапа шеккендеріндегі» Кручинина, М.Каримнің «Ай туылған түніндегі»
Таңқабике, т.б. классикалық бейнелерді сахнаға шебер, әр ұлт менталитетімен
шығара білді. А.Ружева гастрольдік сапармен Алматыда, Ақтөбеде, Байғанинде,
Оймауытта, Қандыағашта, Ойылда, Шалқарда болып, жерлестеріне қызмет етіп,
өнерін көрсетті. Талдықорғанда А.Ружева атында көше бар. Ақтөбе облыстық
тарихи-өлкетану музейінде экспозиция жасақталған. 80 жылдығы аталып өтті. 60
жылдығында (1988) Қазақ КСР Жоғарғы Кеңесінің Құрмет грамотасымен марапатталды.